ഉപഗ്രഹം താഴോട്ട് വീഴാത്തത് എന്ത് കൊണ്ട്?

ഉപഗ്രഹങ്ങൾ എങ്ങനെയാണ് ഭ്രമണപഥത്തിൽ തുടരുന്നത്? 

------------------------------------------------------------------------------

ഉപഗ്രഹങ്ങൾ ഭൂമിയിലേക്ക് വീഴാതെ എങ്ങനെയാണ് ബഹിരാകാശത്ത് കറങ്ങിക്കൊണ്ടിരിക്കുന്നത് എന്നതിനെക്കുറിച്ച് നിങ്ങൾ ചിന്തിച്ചിട്ടുണ്ടോ? നമുക്ക് അതൊന്ന് ലളിതമായി നോക്കാം.

നിങ്ങൾ ഒരു കല്ലെടുത്ത് ദൂരേക്ക് എറിയുകയാണെന്ന് സങ്കൽപ്പിക്കുക. ആ കല്ല് ഒരു വളഞ്ഞ പാതയിലൂടെ പോയി അവസാനം താഴെ വീഴും, കാരണം ഭൂമിയുടെ ഗുരുത്വാകർഷണം അതിനെ താഴേക്ക് വലിക്കുന്നു. നിങ്ങൾ കല്ല് കൂടുതൽ ശക്തിയായി എറിഞ്ഞാൽ അത് കൂടുതൽ ദൂരം പോകും, പക്ഷേ അത് ഇപ്പോഴും നിലത്ത് വീഴും. ഇനി നമ്മുക്ക് ഈ കല്ല് അസാമാന്യമായ ശക്തിയിൽ, ഒരുപാട് ദൂരത്തേക്ക് എറിയാൻ കഴിഞ്ഞിരുന്നെങ്കിൽ എന്ത് സംഭവിക്കുമെന്ന് നോക്കാം. അത് ഭൂമിയെ ചുറ്റി നിങ്ങളുടെ പിന്നിൽ തന്നെ വന്നു വീഴും! ഇത് ഒരുതരം ഭ്രമണപഥം പോലെയാണ് പ്രവർത്തിക്കുന്നത്.

പക്ഷേ ഇവിടെ ചില പ്രശ്നങ്ങളുണ്ട്. കല്ല് മരങ്ങളിലോ കെട്ടിടങ്ങളിലോ തട്ടാം, അല്ലെങ്കിൽ കാറ്റിന്റെ പ്രതിരോധം കാരണം അതിന്റെ വേഗത കുറയാം. ഇത് ഒഴിവാക്കാൻ, കല്ല് ഭൂമിയുടെ അന്തരീക്ഷത്തിന് മുകളിൽ എത്തിക്കണം. അവിടെ തടസ്സങ്ങളില്ലാത്തതുകൊണ്ട് അതിന്റെ വേഗത കുറയില്ല.

ഉപഗ്രഹങ്ങൾ വീഴാത്തത് എന്തുകൊണ്ട്?

ഉപഗ്രഹങ്ങളും ഒരുതരം കല്ലുകൾ പോലെയാണ്. അവ താഴേക്ക് വീഴുന്നില്ല, കാരണം അവയുടെ മുന്നോട്ടുള്ള വേഗതയും ഭൂമിയുടെ താഴേക്കുള്ള വലിവ് ശക്തിയും ഒരുപോലെയാണ്. ലളിതമായി പറഞ്ഞാൽ, ഉപഗ്രഹങ്ങൾ നിരന്തരം ഭൂമിയിലേക്ക് "വീണുകൊണ്ടിരിക്കുകയാണ്", പക്ഷേ അവ ഭൂമിയുടെ വക്രതയ്ക്ക് അനുസരിച്ച് വളഞ്ഞ പാതയിലൂടെയാണ് സഞ്ചരിക്കുന്നത്. അതുകൊണ്ട്, അവ ഒരിക്കലും ഭൂമിയിൽ തട്ടുന്നില്ല.

ഓരോ ഉയരത്തിലും ഭ്രമണപഥത്തിൽ എത്താൻ ഉപഗ്രഹത്തിന് ഒരു പ്രത്യേക വേഗത ആവശ്യമാണ്.

* വേഗത കുറവാണെങ്കിൽ, ഉപഗ്രഹം ഭൂമിയിലേക്ക് വീഴും.

* വേഗത കൂടുതലാണെങ്കിൽ, അത് ഭൂമിയുടെ ഗുരുത്വാകർഷണത്തിൽ നിന്ന് രക്ഷപ്പെട്ട് ബഹിരാകാശത്തേക്ക് പറന്നുപോകും.

   ഭൂമിയുടെ ഗുരുത്വാകർഷണത്തിൽ നിന്ന് പൂർണ്ണമായി രക്ഷപ്പെടാൻ ഏകദേശം 11.2 കി.മീ/സെക്കൻഡ് വേഗത ആവശ്യമാണ്. 

ഉപഗ്രഹങ്ങളെ വിക്ഷേപിക്കുമ്പോൾ ശരിയായ വേഗതയിലാണ് വിക്ഷേപിക്കുന്നത്. അതുകൊണ്ടാണ് അവ വീഴാതെ ഭൂമിയെ ചുറ്റിക്കൊണ്ടിരിക്കുന്നത്.

✍   Basheer Pengattiri 

------------------------------------------------------------------------------ #space #satellite #orbit #science #astronomy #technology #earth #gravity